Për vendbanimi do të ishte mirë të përdorej shprehja “domicile”, kurse për vendqëndrimi “residence”. Përveç këtyre, mund të hasim edhe vendqëndrim i përhershëm (habitual residence) dhe vendqëndrimi i përkohshëm (temporary residence).
Dallimi ndërmjet vendbanimit dhe vendqëndrimit është mjaft interesant. Vendbanimi është vendi në të cilin njeriu dëshiron të qëndrojë, ai zgjedh ta ndërtojë jetën e vet pikërisht në atë vend. Pra, elementit objektiv i shtohet një element subjektiv. Është vendi që quajmë “shtëpi”, vendi për të cilin na merr malli, vendi ku do të dëshironim të ktheheshim, pavarësisht se ku gjendemi.
Vendqëndrimi lidhet më shumë me një qëndrim të detyruar, ose të diktuar nga rrethanat. Për shembull, nëse ti detyrohesh të largohesh me punë/shërbim (si student, ushtar, diplomat, etj.) në një vend tjetër, në këtë vend ti ke vendqëndrimin dhe jo vendbanimin.